KNO Thailand a tang madun laika hpe aja awa madi shadaw dat ai lam shana shabra dat ga ai

Kachin Politics Mediation Research Network Hkawp hkungga let,
 Mung kan ting jam bra nga ai Jinghpaw Wunpawng amyu sha kaji kaba ni yawng hpang de Ginlam: KNO Thailand a tang madun laika hpe aja awa madi shadaw dat ai lam shana shabra dat ga ai.
 Anhte Kachin Politics Mediation Research Network kawn KNO Thailand a Nhtoi : July shata praw ( 4 ),2013ning KIO de tang madun ai lam hpe madi shadaw ai lam tang shana dat ga ai. Madi shadaw mayu ai lam hta KNO a KIO de tang madun ai laika hta Awm Dawm Shanglawt (absolute Sovereignty Power ) hte seng nna lawm ai lam hpe madi shadaw mayu ai lam rai ga ai.

Jet ai federal mung dan ngu ai lachyum gaw Awm Dawm mung dan ni rau pawng hpawm ai hpe lachyum la ai rai ga ai majaw, jet ai federal mung dan hpe gaw gap ai hta Awm Dawm mung dan asuya ni ra sharawng ai hte she gaw gap sa wa ra ai. Asuya langai hkrai tinang ra ai hkrang hte gaw gap ai federal hkrang hpe nra sharawng ga ai. Awm Dawm mung dan asuya ni myit hkrum ai majaw gaw gap ai federal mung dan rai ra ai.

 Anhte Kachin Politics Mediation Research Network gaw gara gadai mung masa hpung a n-pu e mung n-nga ai wuhpung rai ga ai.
 Jinghpaw wunpawng myu sha ni mung masa hpe wanglu wang lang galaw lu na lam hpe n-gun ja wa na matu yaw shada ai mahkri shawn hpung langai rai ga ai.
 Yawng hpe hkungga let ,
 Matut mahkai :Tangbau Lum Hkawng,
 Yaw Na Lashi ,
+6681 386 3024
 Email: rpi_thai12@yahoo.com

--- shagun laika ------

KNO ,Thailand Kaw Na KIO De Tang Shawn Laika

Jinghpaw Wunpawng Amyu sha Hpung,
Thailand.
Laika masat: :013/kno( thai)2013.
Nhtoi : July shata praw ( 4 ),2013ning.

De,
Ting nyang Up,
Wunpawng Mungdan Shanglawt Hpung,
Wunpawng Gumrawng Gumtsa Mungdan.
Laiza muklum.

Ginlam: Jinghpaw Wunpawng Mungchying mungshawa a nsen hpe matut nna tang shana dat ai lam.

Hkawp hkung ga let,

Wunpawng Mungdan Shanglawt Hpung (KIO) ting nyang up hte ginjaw salang ni yawng hpang de anhte Jinghpaw Wunpawng Amyu sha hpung (Thailand) a hkap lu la ai Mung chying mung shawa nsen hpe matut tang madun dat ga ai.

1. Lai mat wa sai GOC Gen. Salong Zau Seng hte kaga ningbaw ningla ni,magam gun ni hte mungchying mungshawa ni yawng ra sharawng awng ai gaw Awm Dawm Shanglawt(Absolute Sovereinty Power )hpe woi galaw lai wa sai,dai hpe Jinghpaw Wunpawng Amyu sha hpung (Thailand) hku nna matut Hkap la shamu shamawt nga ga ai.

2. Myen hpyen Asuya hte tara shang bawng ban hpawng galaw shagu mung UN dat kasa hte kaga maigan salang ni sak se sa dung lawm tim anhte mungchying mungshawa masha ni ra sharawng awng ai, Awmdawm Shanglawt (absolute sovereignty Power ) ngu ai ga hkaw hpe nbawng ban shalawm ai mu chye lu ai majaw mungdan kata hte maigan mungdan shara shagu du nga jinghpaw Wunpawng Amyu sha ni kaw nna, anhte Thailand kaw nga ai Jinghpaw Wunpawng Amyu sha hpung hpe shana wa ai lam nga ai. Dai majaw, Ndai lam hpe seng ang ai Wunpawng Mungdan Shanglawt Hpung ( KIO ) ni hpang de matut nna tang shana dat ya ai lam re.

3. Lai mat wa sai shaning 2012 ning June shata 27- 29 ya lapran kaw galaw ai KIO hte KNO ni a bawng ban myit hkrum ai hta Ningbaw malai (1) Du kaba Nban La Awng,Ningbaw malai (2),Dap awn daju(CS) Du kaba Gunhtang Gam Shawng hte Tau Dap awn Daju(VCS)

Du kaba Sumlut Gun Maw ni tsun ai mungga hta anhte mung mi moi na Ninggawn Mungmasa lam yan hpe matut nna lang let ya mung ta tut ninghkap gasat nga ai re, ngu nna tsun lai mat wa sai hpe chye na let KNO a hpyen dap rai nga ai UKA hpyen dap hpe mung shawng lam ban dung bung sai re majaw dawm nna KIA hpyen dap hte pawng hpawm dat ai lam nga sai.

4. Dai majaw,du na ra ai bawng ban zuphpawng shagu hta jinghpaw Wunpawng amyu sha yawng ra sharawng ai Awm Dawm Shanglawt (absolute Sovereinty Power ) hpe bawng ban shalawm na lam hte mungkan mungdan ting shana shabra ndau ya na hpe ra sharawngt let tang shawn hpyi lajin dat ga ai.

Hkungga let,
Slg. Nang Zing Naw lawn,
Amu Madu,
Jinghpaw Wunpawng Amyu Sha Hpung( KNO )
Thailand.

— with Lachid Kachin and Kachin Land.