Wednesday, April 14, 2010

www.kachinnews.com/kachin

KIO hpe tsun yu na n lu jang, hkindit jahkrat kau na: Du Daju Lun Mawng
Myen hpyendap ginjaw Naypyitaw na Jahpan Jum Daju, Du Daju Lun Mawng gaw, shi ndai laman, Jinghpaw mungdaw, Manmaw de gan du ai shaloi, “KIO hpe tsun yu na n lu jang, hkindit jahkrat kau na re” nga, mungga tsun wa sai lam, chye lu ai.

Lai wa sai bat manga ya shani, Manmaw mare shara mali hta, ra lata poi hte seng nna, mungmasha zinlum ai mungga tsun shaga ai shaloi, ya na zawn, Dukaba Lun Mawng, KIO de sadi ga shaga wa ai re lam, dukaba a mungga sa madat ai buga masha ni tsun ai.

Maj-Gen-Lun-Maung

Du Daju Lun Mawng, Myen hpyen asuya a Jahpan Jum Daju (Auditor General).

Dukaba Lun Mawng gaw Jarit Sin Dap (BGF) hpe n hkap la hkraw ai KIO hte seng nna, “Ma hpe sharin shaga ai zawn shawng n’nan, n-gup ga hte chye na hkra tsun yu na. N madat jang, lata hte gayet na, dai hpang shingna (dut) hte gayet na. Dai hpang mung n madat jang gaw, hkindit jahkrat kau na re” nga, pawt myiman n’sam hte du sa ai shawa hpe mungga tsun sai lam, mungga sa madat ai buga masha langai tsun ai.

Bai nna, KIO atsun nga ai ga, “BGF gale na lam hpe mungmasha ni myit n hkrum ai. KIO gaw mungshawa ni shangun ai majaw, rawt malan bungli galaw ra ai re, ngu ai ga gaw mai kam na i? Tengman na i? Masu ai lam sha re”, nga nna mung, dukaba Lun Mawng tsun wa sai lam, kahtap chye lu ai.

Shi matut nna, KIO gaw mung up na atsam n nga ai nga nna, “KIO gaw Manmaw ginwang zawn re ai hpe pyi atsawm n chye uphkang ai gaw, mungdaw mungdan uphkang na ngu ai gaw, kaja wa mai byin na kun?” nga nna mung, KIO hpe jahpyak wa sai lam, matut chye lu ai.

Dai sha n nga, mungmasha ni lapran sai garan ai masa hku nna, “Manmaw, Mugawng hte Munyin mare ni hta Jinghpaw ni n law ai. Masha n-gun tsa shadaw 20 sha nga ai, ngam ai 80 gaw kaga amyu Myen, Sam ni she re” nga nna mung, dukaba Lun Mawng, shi mungga hta tsun shalawm ai lam, chye lu ai.

Lai wa sai 1948 ning, January praw 4 ya shani, Munghpawm Myen Mungdan shanglawt lu ai shaloi, kaja wa Myen amyusha ni a ginra gaw, Pyi-ma ngu ai, Mandalay hte Rangung grupyin re. Dai hpe shinggrup da ai gaw, Jinghpaw, Sam, Hkang, Karen, Karenni (Kaya), Rahkai hte Mon ni a mungdaw ni, rai nga ai.

Sam amyusha langai rai nga ai dukaba Lun Mawng gaw, Manmaw mare a sinna maga deng masum gang ai Nawng Hku Sam Pa ngu ai kahtawng na rai nna, dai kaw laika tsang 10 awng du hkra nga kaba let, de a hpang lawu Myen mung de dum nta ting htawt yu mat ai lam, KNG sagawn chye lu ai.

Dukaba Lun Mawng a Manmaw hkrunlam gaw, ra lata poi gabaw hte mungshawa zinlum na matu raitim, kaja wa gaw, KIO hpe jahpyak ai lam hte, Jinghpaw mungdaw na amyusha ni lapran sai garan wa hkra “wan shat” bang ya ai lachyum sha re nga nna, shi a mungga sa madat ai Manmaw na Jinghpaw buga salang ni mu mada nga ma ai re.

Ndai ten, KIO gaw, BGF hte seng nna, Myen hpyen asuya hte bawngban mahtai tam n lu ai lam hpe, Jinghpaw mungchying mungshawa kanu kawa ni hpe azin ayang hpyan dan na matu yaw shada let, tinang ginjaw Laiza hta April 16, ndai bat manga ya shani, zuphpawng shaga tawn sai re.